Sara Etxeberria Zapirainen kartelak iragarriko ditu Sanjoanak
Bozka herrikoian parte-hartzea izugarri handitu da aurten
Sara Etxeberria Zapirain lasartearraren kartelak iragarriko ditu 2025eko sanjoanak. Bere lana izan da bozka herrikoi gehien jaso dituena eta beraz, aurtengo eskuprograma zein karteletan erakusteaz gain, 700 €ko saria jasoko du egileak. Zenbateko horretatik 350 € Hernaniko Berriak dendetan erabiltzeko izango dira.
Aurtengo kartel lehiaketara 18 lan aurkeztu dituzte, eta horietatik bost aukeratu zituen Sanjoanetako Jai Batzordeak. Ondoren, bost kartel horien artean gustukoena herritarrek aukeratu dute, online zein Biteri kultur etxeko postontzian.
Aurten, izugarri handia izan da parte-hartzea: 1.152 bozka jaso dira (iaz 424 izan ziren). Horietatik gehienak, 985, online jaso dira. Etxeberriaren kartel irabazleak 405 lagunen babesa jaso du.